कोल्हापूर, दि. २४ : सम्राट नगर व प्रतिभानगर परिसरातील नागरिकांच्या तक्रारीनंतर कोल्हापूर महानगरपालिकेने पुण्यसृष्टी सहकारी गृहनिर्माण संस्था व संबंधित विकासक रामसिना कन्स्ट्रक्शन्स प्रा. लि. यांना नोटीस बजावली आहे. 

 

महापौर जनता दरबारात दाखल झालेल्या तक्रारीनुसार, पुण्यसृष्टी प्रकल्पाच्या पश्चिमेकडील १२ मीटर रुंद रस्त्यावर फुटपाथ व गटाराचे बांधकाम करून अतिक्रमण करण्यात आल्याची बाब समोर आली होती. तसेच मालती अपार्टमेंट परिसरातील मनपाच्या जुन्या फुटपाथ व गटाराची रचना बदलून चुकीच्या मोजमापाने नवीन बांधकाम करण्यात आल्याचा आरोप करण्यात आला आहे.

याशिवाय, शिंदे अपार्टमेंटजवळील महापालिकेच्या मालकीच्या ओढ्याभोवती पत्र्याचे कुंपण करून तो विकासकाच्या हद्दीत घेतल्याचीही तक्रार नागरिकांनी केली होती.

महापालिकेच्या अधिकाऱ्यांनी प्रत्यक्ष पाहणी केली असता १२ मीटर रुंद रस्त्यावर फुटपाथ व गटाराचे बांधकाम करून अतिक्रमण झाल्याचे निदर्शनास आल्याचे नोटिशीत नमूद करण्यात आले आहे.

महापालिकेने संबंधितांना नोटीस मिळाल्यापासून सात दिवसांच्या आत स्वतःहून अतिक्रमण हटवून खुलासा सादर करण्याचे निर्देश दिले आहेत. अन्यथा महाराष्ट्र महानगरपालिका अधिनियम १९४९ मधील तरतुदीनुसार महापालिकेकडून अतिक्रमण हटविण्याची कारवाई करण्यात येणार असल्याचा इशारा नोटिशीत देण्यात आला आहे.