आज पुन्हा सौ.शौमिका महाडिक यांना प्रत्युत्तर म्हणून दुसऱ्यांनी लिहून दिलेल्या कागदावर सही करून संचालिका श्रीमती अंजना रेडकर यांनी पत्रक प्रसिद्धीस दिले आहे. माझं त्यांना एकचं सांगणं आहे की, इतकीच त्यांना गोकुळच्या कारभाराची माहिती आहे तर सभेच्या दिवशी समोर येऊन आमच्या फक्त ४ प्रश्नांची उत्तरं त्यांनी सर्वांसमोर द्यावीत. उगीच फूटपट्टी घेऊन आभाळाची उंची मोजायचा प्रयत्न श्रीम.रेडकर यांनी करू नये. 

  सौ.शौमिका महाडिक यांना प्रत्युत्तर देणं एवढीच काय ती श्रीम. रेडकर यांची संचालिका म्हणून जबाबदारी दिसते. त्याव्यतिरिक्त संचालिका म्हणून वर्षभरात दूध उत्पादकांच्या हिताची भूमिका मांडताना श्रीम.रेडेकर कधी दिसल्या नाहीत.  

 राहिला विषय राजाराम सहकारी साखर कारखान्याची वार्षिक सभा कधी कुठे झाली याचा तर श्रीमती रेडेकर यांना मी आठवण करून देतो, विनाकारण विषय भरकटू नये. ना तुम्ही राजारामच्या सभासद आहात ना मी.. इथे विषय गोकुळच्या सभेचा आणि मागील वर्षभराच्या कारभाराचा सुरू आहे. अन्यथा जिल्ह्यात वार्षिक सर्वसाधारण सभेचा अहवालच प्रसिद्ध न करणारेही साखर कारखाने आहेत, आणि ते कोणाचे आहेत याची आठवण आम्हाला करून द्यावी लागेल. 

 त्यांच्या पत्रकातील एकच गोष्ट पटण्यासारखी आहे ती म्हणजे गोकुळचे सभासद सुज्ञ आहेत. त्यामुळे सभासद त्यांचे प्रश्न सभेत विचारतीलच, यात काही दुमत नाही. फक्त पुन्हा एकदा मी त्यांना सांगू इच्छितो की, दुसऱ्याच्या पत्रकावर सही करून देण्यापेक्षा गोकुळच्या चांगल्या कारभाराचं प्रशस्तीपत्र देणाऱ्या श्रीमती अंजना रेडेकर यांनी सभेत आमच्या ४ प्रश्नांची उत्तरं समोर येऊन द्यावीत.