जि. प. सदस्या शोभा बेलेकर यांची सार्वजनिक बांधकाम विभागाकडे मागणी

कळे, ता. पन्हाळा : हिंदू धर्मातील अत्यंत महत्त्वाचा आणि पवित्र सण असलेल्या श्री गणेश चतुर्थी उत्सवाला काही दिवसांचा अवधी राहिला आहे. या पार्श्वभूमीवर कळे गावातील प्रमुख मार्गांवर पडलेले मोठमोठे खड्डे तात्काळ बुजवून रस्त्यांची दुरुस्ती करावी, अशी मागणी जिल्हा परिषद सदस्या सौ. शोभा युवराज बेलेकर यांनी सार्वजनिक बांधकाम विभागाकडे निवेदनाद्वारे केली आहे.
कळे हे परिसरातील प्रमुख बाजारपेठ असून गणेशोत्सवादरम्यान परिसरातील विविध गावांमधून भाविक व गणेश तरुण मंडळांचे कार्यकर्ते गणेशमूर्ती नेण्यासाठी मोठ्या प्रमाणात कळे येथे येतात. कळे गावातील 'देसाई गल्ली ते माणिक हॉल' तसेच 'हरिनारायण हॉल, पुनाळा फाटा ते पुनाळ खिंड' हे गणेशमूर्ती ने-आण करण्याचे प्रमुख मार्ग आहेत.
मात्र, गेल्या काही दिवसांत झालेल्या संततधार पावसामुळे या मार्गांवर मोठ्या प्रमाणात खड्डे पडले असून रस्त्यांची दुरवस्था झाली आहे. त्यामुळे वाहनचालक, नागरिक व भाविकांना मोठ्या त्रासाला सामोरे जावे लागत आहे. खड्ड्यांमुळे गणेशमूर्ती नेताना अडचणी निर्माण होण्यासोबतच अपघाताची शक्यताही वाढली आहे.
गणेशोत्सवाचे गांभीर्य लक्षात घेऊन तसेच भाविक व नागरिकांची गैरसोय टाळण्यासाठी कळे येथील दोन्ही प्रमुख मार्गांवरील खड्डे तात्काळ बुजवून रस्त्यांची युद्धपातळीवर दुरुस्ती करावी, अशी नम्र मागणी सौ. शोभा युवराज बेलेकर यांनी उपअभियंता, सार्वजनिक बांधकाम विभाग, उपविभाग पन्हाळा यांच्याकडे केली आहे.