कोल्हापूर पोलीस दलाचे 'ऑल आऊट ऑपरेशन': जिल्ह्यात गुन्हेगारांवर मोठी कारवाई, ठाण्यातील बलात्कार प्रकरणातील फरार आरोपी जेरबंद
schedule07 May 26 person by visibility 138 categoryगुन्हे
कोल्हापूर पोलीस दलाचे 'ऑल आऊट ऑपरेशन': जिल्ह्यात गुन्हेगारांवर मोठी कारवाई, ठाण्यातील बलात्कार प्रकरणातील फरार आरोपी जेरबंद
कोल्हापूर:
जिल्ह्यात कायदा व सुव्यवस्था अबाधित राखण्यासाठी पोलीस अधीक्षक श्री नीलोत्पल यांच्या मार्गदर्शनाखाली कोल्हापूर पोलीस दलाने बुधवारी रात्री 'ऑल आऊट ऑपरेशन' राबवून गुन्हेगारांची मोठी धरपकड केली. या मोहिमेदरम्यान विविध कलमान्वये शेकडो जणांवर कारवाई करण्यात आली असून, ठाणे येथील एका गंभीर गुन्ह्यातील फरार आरोपीलाही अटक करण्यात आली आहे.
रात्रभर जिल्ह्याची कोम्बिंग ऑपरेशनने नाकाबंदी
पोलीस अधीक्षकांच्या आदेशानुसार, दि. ६ मे २०२६ रोजी रात्री १०.०० वाजेपासून ते ७ मे २०२६ रोजी पहाटे २.०० वाजेपर्यंत संपूर्ण जिल्ह्यात ही मोहीम राबवण्यात आली. यासाठी २ अपर पोलीस अधीक्षक, ४ पोलीस उपअधीक्षक, ३७ पोलीस अधिकारी आणि १३६ पोलीस अंमलदारांची एकूण ४२ पथके तैनात करण्यात आली होती. या मोहिमेत रेकॉर्डवरील गुन्हेगार, हॉटेल्स, लॉजिंग, बिअरबार, एसटी स्टँड आणि संवेदनशील वस्त्यांची कसून तपासणी करण्यात आली.
अशी झाली कारवाई (थोडक्यात):
मोहिमेदरम्यान पोलिसांनी विविध अवैध प्रकारांवर कारवाईचा बडगा उगारला:
नॉन बेलेबल वॉरंट: ३९ जणांविरुद्ध वॉरंट बजावणी.
वाहतूक नियम उल्लंघन: दारू पिऊन वाहन चालवणाऱ्या ३४ जणांवर, तर ५४४ वाहन चालकांवर मोटर वाहन कायद्यान्वये कारवाई करून ३,५३,५०० रुपये दंड वसूल केला.
अवैध व्यवसाय व शांतता भंग: उघड्यावर दारू पिणाऱ्या १२ जणांवर आणि सार्वजनिक ठिकाणी शांततेचा भंग करणाऱ्या १८ जणांवर कारवाई केली.
शस्त्र कायदा व दारुबंदी: दारूबंदी कायद्यान्वये ७,०४,८९५ रुपयांचा मुद्देमाल जप्त करण्यात आला, तर शस्त्र कायद्यांतर्गत दोन आरोपींकडून ४२,२०० रुपयांचे मुद्देमाल हस्तगत केले.
वेळेचे उल्लंघन: नियुक्त वेळेपेक्षा जास्त वेळ दुकाने सुरू ठेवणाऱ्या १६ दुकानदारांवर कारवाई करण्यात आली.
फरार आरोपीला हॉटेलमधून ठोकल्या बेड्या
या मोहिमेदरम्यान स्थानिक गुन्हे अन्वेषण शाखेचे (LCB) सपोनि सागर वाघ यांना गोपनीय माहिती मिळाली की, ठाण्यातील कासारवडवली पोलीस ठाण्यात दाखल असलेल्या बलात्कार (कलम ३७६) व इतर गंभीर गुन्ह्यातील फरार आरोपी महेश भाऊराव आहेर हा हातकणंगले तालुक्यातील नरंदे येथील 'हॉटेल अन्नपूर्णा' येथे लपला आहे.
पोलीस निरीक्षक सुशांत चव्हाण यांनी याबाबात पोलीस अधीक्षकांना माहिती दिल्यानंतर मिळालेल्या मार्गदर्शनानुसार, सपोनि सागर वाघ व पथकाने ७ मे रोजी पहाटे ३.०० च्या सुमारास हॉटेलवर छापा टाकून आरोपी महेश आहेर याला ताब्यात घेतले. पुढील तपासासाठी त्याला ठाणे क्राईम युनिटच्या ताब्यात देण्यात आले आहे.
ही धडक कारवाई पोलीस अधीक्षक श्री नीलोत्पल यांच्या मार्गदर्शनाखाली कोल्हापूर जिल्ह्यातील सर्व पोलीस अधिकारी व अंमलदारांनी यशस्वीरीत्या पार पाडली.
