कोल्हापूर : “शिक्षणाशिवाय आपला पर्याय नाही, शिक्षण हे वाघिणीचे दूध आहे,” असा विचार मांडणारे डॉ. बाबासाहेब आंबेडकर यांच्या जयंतीनिमित्त विद्यार्थ्यांसाठी विशेष मार्गदर्शन कार्यशाळेचे आयोजन करण्यात आले आहे. गरिब व वंचित विद्यार्थ्यांना शिक्षणाच्या मुख्य प्रवाहात आणण्याच्या उद्देशाने हा उपक्रम राबविण्यात येत आहे.

सामाजिक न्याय व विशेष सहाय्य विभाग, सहाय्यक आयुक्त समाज कल्याण कार्यालय, विचारमाळे (कोल्हापूर) येथे बुधवार, दि. 29 एप्रिल 2026 रोजी सकाळी 10 वाजता ही कार्यशाळा होणार आहे.

या कार्यशाळेत अनुसूचित जातीतील विद्यार्थ्यांसाठी विशेष मार्गदर्शन केले जाणार असून इयत्ता सहावी ते दहावी तसेच पदवी व पदव्युत्तर शिक्षण घेणाऱ्या विद्यार्थ्यांसाठी विविध शैक्षणिक संधींची माहिती दिली जाणार आहे. विविध शिष्यवृत्ती योजना, मोफत वसतिगृह सुविधा तसेच शासनाच्या विविध योजनांची सविस्तर माहिती एकाच ठिकाणी उपलब्ध करून दिली जाणार आहे.

विद्यार्थ्यांनी आणि पालकांनी या संधीचा लाभ घ्यावा, असे आवाहन आयोजकांकडून करण्यात आले आहे. नाव नोंदणीसाठी 9765024443 या व्हॉट्सअ‍ॅप क्रमांकावर संपर्क साधावा, असेही सांगण्यात आले.

ही कार्यशाळा कृती बहुउद्देशीय फौंडेशन तसेच सामाजिक न्याय व विशेष सहाय्य विभाग, सहाय्यक आयुक्त समाज कल्याण, कोल्हापूर यांच्या संयुक्त विद्यमाने आयोजित करण्यात आली आहे.